Skip to Secondary Navigation Skip to Main Content

Current Domain

Languages

في هذا القسم

ازاى تحفز من نفسك ؟

  

كل فرد فينا بيواجه في حياته صعوبات ويأس واحباطات وشك في قدراته ، الناجح هو اللي بيقدر ياخد من كل اللحظات دى تحفيز ليه ويقرر انه هيتحدى نفسه عشان يوصل لهدفه مهما كان صعب او مستحيل في وجهة نظر اللي حواليه .
اهم حاجة لازم تاخد بالك منها هى لحظة الاحباط او اليأس او الفشل الاولى ، لو قدرت تفهم نفسك كويس وتتغلب علي مشاعرك السلبية هتنجح وتقدر تكمل ، حاول دايما تحفز نفسك وتقول مش مشكلة كل الناس اللي نجحت فشلت في الاول كتير ، ودور علي الحاجات السهلة اللي ممكن تبدأ بيها وتقدر تنجزها بإتقان ، ودى كافية بانها تشجعك قوى للفترة اللي بعدها .
في 3 اسباب هى اللي بتخلينا مبنعرفش نتفائل او نتشجع اننا نكمل الطريق اللي كنا راسمينه لحياتنا :
1-  اكتر حاجة كلنا بنعانى منها هى عدم الثقة ، بخطط لنفسي الهدف بس من جوايا بسأل مليون مرة معقول هقدر ، ممكن احقق ده ، لا انا مش ممكن هعمل كدة ........
2-  عدم التركيز وتحديد الهدف ، كتير مننا بيقول نفسي ابقي غنى .....ويقف طب يعنى عايز تبقي ايه ؟ متلاقيش اجابة . كل اللي عنده انه عايز يبقي حاجة كويسة ويعيش في مستوى كويس . طيب حدد بقي انت عايز ايه ، نفسك تكون ايه؟
3-  مفيش توجيه ،حددت نفسك تبقي ايه وسكت ..... وبعدين ؟ ايه الخطوات اللي توصلك للهدف ده ؟ مفيش اجابة............
ازاى تزود الثقة في نفسك :
1-  اكتر حاجة بتخلي الانسان مش واثق في نفسه انه مش بيكون شايف الحاجات الكويسة اللي جواه ، من علامات الانسان القوى الناجح انه بيكون عارف نقط ضعفه وقوته .
 هنا يبقي حاجة كويسة لو قررت تقعد مع نفسك وتشوف ايه الحاجات اللي انت كويس فيها وايه الحاجات الضعيفة اللي فيك ، وحلو اوى لو قدرت كمان تسأل اصحابك اللي حواليك القريبين منك ، وممكن كمان اهلك في البيت ، اى حد بيحتك بيك ويعرفك وممكن يساعدك لما تسأله .
2-  لما توقف تفكير في كل اللي انت فيه وتركز بس في هدفك ، هتلاقي المخ لوحده بدأ يفكر في خطط ويسألك ايه رأيك فيها ،وممكن كمان يفكرك بلحظات الفشل اللي مريت بيها ، وساعتها فكر انت ليه وقعت فيها عشان تتعلم منها .
3-  حلو كمان انك تفكر في الحاجات الايجابية اللي في حياتك وحدد من خلالها نقط القوة اللي عندك ومميزاتك وده هيشجعك اوى وهيخليك في حالة نفسية كويسة .
4-  قول لنفسك انك هتقدر وان مفيش مستحيل وكرر لنفسك دايما الكلام ده ، وان مهما حصل انت عمرك ما هتقف ولا تبطل تفكر في حلمك اللي هتحوله لحقيقة ، لانه مهما يكون مش صعب ولا مستحيل .عشان فعلا توصل لهدفك لازم تكون مقتنع من جواك انك هتقدر توصله وانك تستحقه .
ازاى تقدر تركز وتحدد اهدافك :
 اغلب الناس مش بيكون عندها هدف هى بتدور بس علي شغل عشان خايفة من الفقر مش عايزين يتعرضوا لانهم يكونوا محتاجين حاجة ومش لاقينها ، عايزين الناس لما تشوفهم تحترمهم ، لكن مش عشان نفسهم بكرة يكونوا حاجة كويسة ، وطبعا من اقل مشكلة تلاقيهم يفقدوا الامل ويقرروا انهم مش هيستمروا .
لازم تحط هدف ليك وتفكر لو وصلتله حياتك هيكون شكلها ايه ، ولادك هيعيشوا ازاى ، وممكن تاخد من خوفك وتفكر يعنى مثلا لو خايف من الفقر فكر ازاى تبقي غنى مش بس انك تسد احتياجاتك ، وتخيل ان ولادك في مدارس كويسة وبياكلوا اكل كويس .وساعتها هتلاقي المخ بيفكر في خطط للنجاح بدل من الخوف من المستقبل .
 ازاى توجه نفسك :
 لازم يكون عندك اهداف غير محدودة ، متقولش انا نفسي ابقي محاسب كبير ولما توصله تقول الحمد لله كده كفاية ، لأ فكر ان بعد كدة ممكن تبقي مدير للحسابات وتوصل لانك تكون مدير الشركة وبعد كدة يمكن يكون عندك شركتك الخاصة.
وحط لنفسك خطة كل يوم ، وقيمها في اخر اليوم ، قول لنفسك انا عملت ايه انهاردة عشان اوصل لهدفي ؟ وعلي فكرة الخطط الصغيرة دى هتحفزك جدا وتشجعك .ولازم تاخد بالك كويس ان لو تخطيطك وتوجيهك كان غلط هتلاقي نفسك يأست وفقدت الامل ونسيت كل النجاح اللي حققته قبل اللحظة دى .ومش لازم تعمل كل يوم حاجة قوية ، المهم انها تكون حاجة تخليك ماشي في نفس الخط بتاعك ، ومتقعش منه .
كمان لازم يكون عندك خطة بديلة ، لانك ممكن تكون حاطط خطة صعبة او لقيت نفسك مش هتقدر تمشي فيها ، هتعمل ايه؟
وطبعا خد بالك ان اكيد هيجيلك لحظات فشل واحباطات ، ده شئ طبيعي ومتوقع ،بس لازم تبقي واثق انك لو نفذت الكلام ده عن اقتناع وثقة، هتقدر تتغلب علي أي لحظات فشل او احباطات.

 

4.5
المعدَل 4.5 (10 votes)
Your rating: لا يوجد
© حق النشر 2001 - 2017 One Global Economy Corporation