Skip to Secondary Navigation Skip to Main Content

Current Domain

Languages

في هذا القسم

يجب ان تعلم .. قبل البحث عن وظيفة؟

 

 
للوصول الى وظيفة مناسبة لازم تكون محدد أهدافك وتقوم ببحث متعمق عن الوظائف اللي بتحقق أهدافك العملية، ودي شوية خطوات تبدأ بيها عشان تدوّر بشكل صحيح على الوظيفة
 
أولا: قيم نفسك
حدد مهاراتك وقدراتك واهتماماتك وخبراتك والقيم اللي تهمك ونقاط القوة والضعف في شخصيتك… وعلى أساس كل ده هتختار من بين الوظائف اللي هتقابلها.
 
ثانيا: استكشف الخيارات المتاحة لك
- ابحث عن الوظائف اللي تناسب اهتماماتك ومهاراتك وخبراتك.
- اسأل عن معلومات عن كل وظيفة من خلال أصدقائك ومعارفك اللي عندهم المعلومات دي، اسأل أصدقائك اللي بيشتغلوا في الشركات اللي انت مهتم بيها… اسأل زمايلك في شغلك القديم… واطلب من كل اللي بتتكلم معاه لو يعرف حد عنده المعلومات اللي انت طالبها واطلب انه يوصلك به… وحاول تكوّن شبكة علاقات من المعارف تأخد منهم المعلومات وممكن يساعدوك انك تعرف معلومات عن وظائف تانية أنسب.
- حاول تبني خبرات ليها علاقة بالوظيفة اللي انت مهتم بيها… يعني لو فيه وظيفة تانية هتديك خبرات هتفيدك في انك توصل لمستوى أفضل ممكن تشتغل في الوظيفة دي فترة كمرحلة مؤقتة ودي دقق عليها جدا …. والخبرات دي مش بس في الشغل، ممكن تكون عمل تطوعي ليه علاقة بالوظيفة دي، أو فرصة في برنامج تدريب.
 
ثالثا: حدد أهدافك العملية
- حدد نوع/ أنواع الوظائف اللي بتفضلها… وأنواع المؤسسات اللي تفضل تشتغل فيها… وهل عندك استعداد للسفر في الداخل أو الخارج ولا لا.
- حدد إذا كنت محتاج تدرس أكتر عشان توصل للوظيفة اللي عايزها ولا لا.
- وبناء عليه حدد هتبحث في أي اتجاه… واعمل خطة بديلة لو مش لاقي الوظيفة اللي عاجباك دلوقتي يبقى ايه تاني أفضل وظيفة بالنسبة لك؟ وهل عندك استعداد تشتغل في وظائف مؤقتة أو في مشروعات بتعاقد لمدة محددة.
 
رابعا: خليك مستعد وابدأ الشغل
- حضّر سيرتك الذاتية وأضف خبراتك الجديدة من شغل جديد أو تدريب أو دورة تدريبية أو عمل تطوعي… وخلي حد من أصدقائك يكون دقيق يقرأها وينتقدها ويقولك ايه اللي ناقصها ويدوّر على أي أخطاء فيها عشان تحسن منها.
-  اطلب من حد من اصدقائك إنه يعملك مقابلة شخصية افتراضية… دور على أشهر اسئلة مقابلة العمل وهو ياخد دور موظف الموارد البشرية اللي هيعمل المقابلة وانت تجاوب على أسئلته بشكل جدي وكأنك في مقابلة حقيقية… وخليه في الآخر يقولك تعليقه على إجاباتك وازاي تحسن من أدائك في المقابلة.
- فكر بنفس طريقة صاحب العمل واسأل نفسك: “ازاي ابقى مرشح مناسب للوظيفة؟ ايه اللي محتاج احسنه عشان انجح فيها؟”
- كن على اتصال بالأصدقاء والمعارف والأقارب والجيران… لأن شبكة العلاقات مهمة جدا.
- ابحث بشكل دائم عن المؤسسات والشركات اللي في مجال تخصصك واجمع معلومات عنها.
- ابحث عن فرص العمل في المواقع الإلكترونية للتوظيف زي jobsegypt.mysouktel.com حمل سيرتك الذاتية عليه وابدأ رحلة البحث.
- احرص على تحديث صفحتك على Linkedin لأن أصحاب الوظايف ممكن يوصلولك عن طريقه.
- ابحث عن فرص العمل في مجموعات شبكات التواصل الاجتماعي والمهني زي facebook و Linkedin… وهي طريقة جديدة نسبيا ممكن جدا تلاقي من خلالها فرص عمل ممتازة بس متصقش في كل الي بيتعرض عليك من فرص.
-  طبعا استخدم الطرق التقليدية في البحث عن فرص العمل… ابعت سيرتك الذاتية للشركات اللي بتفضلها من خلال البريد الإلكتروني… واقرا عن اعلانات الوظائف في الصحف لأنه بيتم الاعلان عن وظائف كتير بالطريقة دي.
- احضر معارض وفعاليات التوظيف اللي بتتعمل كل فترة… وطبعا خد معاك عدد كافي من النسخ لسيرتك الذاتية.
- احضر كل المقابلات الشخصية اللي الشركات تطلبها منك… حتى لو مش واثق انك جاهز… مع كل مقابلة هتكتسب خبرة هتفيدك في المستقبل.
- تابع المعدل اللي انت بتطور فيه من نفسك… كل فترة اسأل نفسك هل فيه تحسن ولا تأخر وهتعمل ايه عشان تحسن من موقفك.
 
خامسا: بعد مقابلة العمل
- حدد المرتب المناسب قبل ما تبدأ عملية التفاوض على عرض العمل…. وده بتحدده بناء على معلومات عن المستوى المقبول للمرتب في المستوى الوظيفي اللي انت هتبقى عليه.
- خليك فاهم إن الرفض جزء من عملية البحث عن وظيفة… اليأس والإحباط مش مسموح… لما تترفض في وظيفة ده لازم يبقى دافع ليك عشان تحسن من نفسك.
 
 
 
 

 

0
No votes yet
Your rating: لا يوجد
© حق النشر 2001 - 2017 One Global Economy Corporation