Skip to Secondary Navigation Skip to Main Content

Current Domain

Languages

في هذا القسم

هى لغة عامية ولا لهجة ؟

  

اللغه المصريه الحديثه أو المصرى هى اللغه اللى المصريين بيتكلّموها فى مصر ، ابتدا تاريخها فى دلتا النيل حوالين بلادها الحضريه زى القاهره وإسكندريه. النهارده اللغه المصرىة هى اللغه السايده فى مصر و بيفهما معظم سكّانها و فى الصعيد بيتكلم المصريين صعيدى.

اللغه المصريه الحديثه هى لغه معترف بيها فى العالم عن طريق كود اللغه بالنسبه لقانون المنظمه الدوليه للتوحيد القياسى (ايزو 639), و هو arz.

اللغه مشهوره بأسامى تانيه زى ”العربى المصرى“ او ”العاميه المصريه“ .

فى جنوب مصر الناس بتتكلم ”صعيدي“ و هى لغه بنفسيها معترف بيها فى العالم عن طريق كود اللغه بالنسبه لقانون المنظمه الدوليه للتوحيد القياسى (ايزو 3-639), و هو aec. شويه من اهل وجه بحرى و القاهره بيلاقوا صعوبه فى فهم شوية كلام صعيدى.

المصرى لغه ماخدتش نصيبها من الكتابه, بس ساعات بيتكتب بيها فى الروايات, و معظم المسرحيات, و الاشعار و الازجال و كمان فى مجلات ورسوم الكاركاتير و الاعلانات, و شوية جرانين ، وأخيراً فى كتب إنكتبت بـ اللغه المصرى الحديثة. أكترية طرق الإعلام المكتوبه و أخبار التليفزيون بتبقى بـ العربى الكلاسيكى بعد تطويرهُ و تعديلهُ. دلوقتى بقى فيه شويِة قنوات بتستعمل "المصرى" بدل "العربى فى الاخبار, زى قناة ”OTV“ ، وكمان كان بيتكتب بيه شعارات الحزب الوطني الديموقراطي المنحل .

اللغه المصريه الحديثه هى اللغه الأُم لـ 76 مليون مصرى و هى فى الحقيقه لغه مستقله من أصل «حامي» (افريقى) و هى إمتداد لـ حروف اللغات المصريه القديمه و ليها قواعد مختلفه عن قواعد اللغه العربى, فى تركيب الجمل, وتصريف الكلام و أخدت مفردات كتير من اللغه العربى و كمان من لغات تانيه زى اللغه القبطى (لغة المصريين قبل حكم العرب لمصر) و التركى و الانجليزى و الفرنساوى. اللغه المصرى الحديثه بيتكلمها اكتر من 76 مليون واحد فى مصر و بيفهمها كويس سكان البلاد اللى حوالين مصر بسبب إنتشار المسلسلات و الأفلام و الأغانى المصريه. و المصرى لغه ليها لهجات و من أكبر اللهجات دى البحيرى و الصعيدى و كل واحده فيهم ممكن تتقسم لـ لهجات فرعيه تانيه و فيه مجهودات علشان يبقا للمصرى قاموس. زى الفارسى و غيره .

اللغه المصريه بتتكتب بالالفاباتيه العربى و الفرانكو فى أغلب الأوقات, بس كمان فيه دعوات من وقت للتانى لكتابتها بـ الحروف اللاتينى او بالحروف القبطى.

اللغه المصريه الحديثه مليانه كلام من اللغه المصريه القديمه و القبطى. معظم اسامى المدن و القرى فى مصر بتاعة دلوقتى متاخده من الاسامى المصريه القديمه و القبطى.

ومن الكلمات المصريه القديمه و القبطى فيه اكتر من 5000 كلمه بيستخدمها المصريين فى لغتهم الحاليه زى : " ادينى " اللى اصلها تى (ادى) + نى (انا)  ، ايقونه = صوره ، باميه (نوع من الخضار) ، بح = خلاص ، بخ = عفريت او حاجه تخوف ، بشبش = مبلول بالمايه ، بكاش = كتير الكلام ، بصاره (اكله)  ، و ألاف الكلمات غير دى.

المصرى بيتكلمه حوالى 76 مليون مصرى جوّه مصر زائد المصريين المهاجرين لمناطق زى الشرق الاوسط, اوروبا, أمريكا الشماليه, اُستراليا و جنوب شرق اسيا. المصرى كمان بقى لغة التواصل المشترك (لينجوا فرانكا) بين شعوب الدول اللى حوالين مصر‏ و دا راجع لـ سببين اساسيين:

   - انتشار و شعبية الأفلام المصريه و الاعمال الفنيه التانيه من بدايات القرن العشرين.

- و كمان بسبب الأساتذه المصريين اللى بعتتهم مصر علشان يأسسو النظام التعليمى فى دول شبه الجزيره العربيه و الجزاير و ليبيا.

 

فى اليمن مثلاً, فيه يمنيين إتاثـّرو بشكل كبير باللغه المصرى و دخّلو كلام مصرى زى كويّس و كدا جوه اللغات بتاعتهم. نفس الحاجه بنلاقيها فى السودان و الشام و فى ليبيا. الإتجاه دا دلوقتى خّف شويه بسبب اللغه اللبنانى بسبب الأعمال الفنيه و الإعلام اللبنانى اللى نجح بشكل كبير فى الفتره الاخيرة على الرغم من ان كتير من المغنيين اللبنانيين لسه بيغنو أغانيهم بالمصرى.

بعد غزو العرب لمصر فى سنة 641 م ابتدا العرب فى فرض لغتهم و مضايقة المصريين اللى بيتكلمو بالقبطى و وصل فى بعض الأوقات فى مناطق معينه لـ قطع لسان اى واحد مصرى بيتكلم قبطى و زاد الضغط على المصريين بعد تعريب الدواوين وبقت من شروط التعيين فى اى شغلانه فى الدواوين (الوزارات دلوقتى) هو الكلام باللغه العربى. و لمدة تلات قرون بعد الغزو كان فيه ازدواجيه لغويه فى مصر بين القبطى و العربى. الازدواجيه دى فضلت فى الصعيد لمده طويل جداً بيقدرها شوية علما لحد القرن السبعتاشر و بالذات بين الفلاحين و بين الستات اكتر من الرجاله. المصرى يمكن يكون إبتدا فى الفسطاط, اول عاصمه اسلاميه لمصر. الحاكم بأمر الله حرم استخدام "القبطى" حتى فى صلاة المسيحيين.

اللغه عند المصرى هى اداه مش هدف يعنى مش اكتر من وسيله بيستخدمها للتفاهم مع الغير و التعبير عن افكاره ، وسيله مش حاجه من مقدساته.

اللغه المصريه الحديثه لغه بتدرس فى جامعات و معاهد كتيره فى العالم و هى لغه بتعترف بيها المنظمه الدوليه للتوحيد القياسى (ISO), و كود اللغه arz بالنسبه لقانون المنظمه الدوليه للتوحيد القياسى (ايزو 639) بس لحد دلوقتى مالهاش صفه رسميه من الحكومه المصريه اللى مش بتعترف بيها على انها لغه مستقله.

المصرى بتاع انهارده بيستخدم اكتر من 5000 كلمه مصريه وقبطيه قديمه فى عيشته اليوميه كان بيستخدمها اجداده و الكلمات دى ألفاظ لغويه مصريه اصيله ماهياش لهجه عربيه أو لكنه مصريه لكلام عربى. باقى الكلمات اللى بيستخدمها المصرى ماهياش كلهاعربى لكن كلمات من اصول مختلفه زى التركى و الفارسى و لغات اوروبيه.

اللغه المصرى اتطورت لغاية ماخدت شكلها بتاع دلوقتى عن طريق بناها الشخصى و الكلمات اللى استوعبتها من لغات زى التركى والفارسى و العربى و اليونانى و الطليانى و الانجليزى و الفرنساوى وغيرها ، و ده حصل على ارضيتها و قواعدها و صوتياتها و تصاريفها هى. اللغه المصرى ماهياشى لهجه للعربى أو عاميه للعربى لكن لغه قايمه بنفسها ، و اللغه المصرى ممكن تكون " فصحيه " أو " عاميه " زى حال اى لغه. اللغه المصريه الفصيحه هى اللغه اللى بيستخدمها المصرى فى مناقشة أو كتابة المواضيع العلميه و الادبيه و الفنيه او فى المحاضرات الجامعيه. العربيه الفصحى مالهاش وجود فى مصر ، و ده اكمن اللغه العربى مالهاش اصلا عاميه تقدر تخرج منها لغه فصحى و دليل كده ان مفيش لغه عاميه خرجت منها اللغه العربيه الفصحى.

من جهه تانيه اللغه المصرية بتتفوق على العربى بإنها لغه ديناميكيه بتتطور يوماتى و بتدخلها مفردات جديده لانج ماكانتش فيها قبل كده وده بيحصل فى فترات قصيره ، تقريبا كل عقدين من الزمن.

 و السؤال البديهى هو إذا كانت الكلمات دى عربى فليه ما بيفهمهاش العربى وليه هو ماقدرش يطورها من لغته الاستاتيكيه؟

 

0
No votes yet
Your rating: لا يوجد
© حق النشر 2001 - 2017 One Global Economy Corporation